Rulu de rabu de xatu con crema de patates panadera
JOSÉ MANUEL POLADURA, NOELIA SUÁREZ Y MARTA MONTEQUÍN
Restaurante La Tabla
Rulu de rabu de xatu con crema de patates panadera
ELLABORACIÓN PAL GUISU DE RABU
Adobar el rabu de xatu col ayu picao y salpimentar. Nuna pota grande echamos un chorru d’aceite d’oliva y ponémoslo al fueu. Echamos el rabu de xatu nel aceite y reservamos. Llimpiamos y cortamos les verdures en cachos medianos, dorámosles un poco nel aceite onde doramos el rabu. Añadimos les yerbes aromátiques al gustu, amestamos el rabu, moyamos col vinu y un chorru de coñá, cubrimos con agua y dexamos cocer seliquino hasta que la carne separte bien del güesu.
Quitamos del fueu, dexamos enfriar y separtamos la carne del güesu, reservamos. Esfaraguyamos, colamos la salsa y reservamos.
ELLABORACIÓN PAL RULU DE RABU
Estiramos les tayaes de cecina montándoles un poco. Distribuimos a lo llargo la cecina un cordón de micuit y enrollamos la cecina sobre él, faciendo un rulu.
Reservamos.
Ponemos un cachu grande de film enriba la mesa, distribuimos pel film la carne de rabu formando una capa fina, ponemos na parte baxa sobre’l rabu’l rulu de cecina y micuit y ayudándonos col film enrollámoslo formando un rulu. Reservamos en frío.
ELLABORACIÓN PA LA CREMA DE PATATA PANADERA
Pelamos y cortamos la cebolla en xuliana, doramos un poco d’aceite y dexamos pochar bien, moyamos con un chorru bonu de vinu blanco y dexámoslo reducir, amestamos la patata cortada en llámines, afogamos un pocoñín, salpimentamos al gustu, cubrimos con agua y dexamos cocer. Cuando tea bien cocida, machacamos y reservamos.
MONTAX Y SERVICIU
Cortamos tayaes de pan lo más fines posible. Quitamos-y el film al rulu de rabu de xatu y coles llámines de pan enrollámoslu, poniendo-y una capa esterior. Cortamos el rulu al bies en cachos d’unos 10 centímetros.
Ponemos a calentar la crema de patata panadera, calentamos y reducimos un poco la salsa del rabu y metemos al fornu los rulos de rabu envueltos en pan (enfornar 10 minutos a 180 ºC).
Ponemos un poco de la crema panadera nel fondu’l platu, ponemos el rulu de rabu de xatu enriba y bañámoslu parcialmente cola salsa de rabu.
INGREDIENTES (PAL GUISU DE RABU)
– 2500 gr de rabu de xatu
– 900 gr de cebolla
– 150 gr de pimientu colorao
– 150 gr de pimientu verde
– 1 botella de vinu tinto
– Romeru
– Tomillu
– Sal
– Pimienta
– Aceite d’oliva
INGREDIENTES (PAL RULU DE RABU)
– La carne guisao de rabu
– Tayaes fines de cecina
– Micuit de patu
– Film
INGREDIENTES (PA LA CREMA DE PATATA PANADERA)
– 200 gr de cebolla
– 200 gr de patata
– Aceite d’oliva
– Vinu blanco
– Sal
INGREDIENTES (PA MONTAX Y SERVICIU)
– Pan de panchón (o tamién val tipu molde)