Pizza de la casa

Pizza de la casa

ELLABORACIÓN

Entamamos faciendo la masa; magar que lo tarrezamos, cualquiera de nós, con dalgo de tiempu (agora ye lo que nos sobra a munches y munchos) podemos facer la nuestra masa de pizza en casa, y cola ayuda de los fíos, que de xuru esfruten bien d’ello.
Vamos facer masa pa más o menos una bandexa de fornu de les midíes que toos tenemos en casa, pa lo que vamos usar fariña, formientu, agua, aceite d’oliva, sal y más nada.
Vamos usar 500 gr de fariña, una cuyarada sopera rasa de formientu qu’entemecemos nuna fuente, cuando tean mecíes vamos poniendo l’agua tebio (non muncho) y revolvemos con una cuyar; añadimos sal al gustu y siguimos revolviendo, ponemos otru plizcu d’agua y siguimos revolviendo y rematamos con un chorru d’aceite d’oliva; amestamos bien y sacamos la masa de la fuente y nuna superficie plana vamos amasando dando forma de bola a la nuestra mezcla, siempre de fuera p’adientro; si nos queda la masa pegao a les manes, ponemos un pocu fariña y siguimos hasta consiguir una bola.
Agora vamos dexala posar unes 2 hores o 2 hores y media, tapándola con un trapu húmedu pero bien decurríu; en pasando esti tiempu yá tendrá’l triple de volume y va ser cuando la estendamos na bandexa del fornu untada con aceite, tentando que nos quede’l mesmu grosor per tolos llaos; después echamos tomate – ha ser un tomate de calidá, de bote o lata, pero de calidá- que podemos especiar al gustu con oriéganu, albahaca, pimienta… lo que vos pete. Depués cubrimos con mozzarella picao y tocín, al gustu tamién. Pa rematar, recalentamos el fornu a tope y después metemos la pizza qu’a los pocos minutos yá va tar llista (el tiempu depende de cada fornu) ¡A esfrutala!