Patates a la importancia y güevos rellenos al estilu de la güela Flora

Patates a la importancia y güevos rellenos al estilu de la güela Flora

ELLABORACIÓN

Pélense y llávense les patates. Córtense al estilu panadera, pero un poco más gordes (aproximadamente 1 cm de grosor).
Cuécense los güevos, pélense y pártese caún d’ellos pela metá. Nun cuencu, sepártense toles yemes (sacante dos que reservamos pa la salsa), amiéstase’l bonitu, la cuyarada de tomate frito, les aceitunes, media seruga d’ayu y una cañina de perexil. Harmonízase la mezcla y rellénense los güevos.
Rebozamos les patates, primero en fariña y dempués en güevu. Nun sartén, freímosles n’aceite d’oliva pelos dos llaos hasta que doren un poco. Sáquense y van colocándose nuna tartera. De siguío rebozamos los güevos y freímoslos del mesmu mou. Sáquense y colóquense n’otra tartera cola yema p’arriba.
Nun morteru, machácase una seruga d’ayu, 3 cañines de perexil y un poco de sal.
Pa iguar la salsa, puede usase’l mesmu sartén qu’emplegamos pa freír les patates y los güevos, quitándo-y la mayoría del aceite. Añádese nel sartén una cebolla picada y déxase pochar despacín 5 minutos. Dempués, amestamos la mezcla del morteru, un vasu de vinu blanco, l’azafrán, les yemes de güevos que reserváramos y una fueya de lloréu. Mézclase too bien y déxase cocer 8-10 minutos a fueu medio.
Incorpórase la metá de la salsa na tartera onde se tienen reservaos los güevos y la otra metá na tartera de les patates. Déxase cocer caúna d’elles demientres 7-8 minutos a fueu suave.
Nota: pueden colocase les patates y los güevos nun mesmu recipiente.

¡Y qu’aproveche! Esperamos que disfruten d’esta receta. Dende El Saúco queremos mandar un saludu candial a tolos y toles xixoneses, munchu ánimu y alcordáivos que de momentu #YoQuedoEnCasa #xixónQuedaEnCasa.