Paletilla corderu

Paletilla corderu

Nestos momentos que, pola nuestra salú, tenemos que quedar en casa, aumentó la venta de carne de ternera. Sicasí, amenorgó la venta de productos de mayor demanda na hostelería como la carne de vacunu o de corderu. Polo que ye un bon momentu pa mercar estos productos por mor de la baxada de preciu. Nel nuestru pequeñu restorán basamos la carta na parrilla de carbón. La preparación de carne a la brasa ye cenciello poniendo procuru nel manexu correutu del carbón y la eleición del productu. Como nun ye frecuente tener una parrilla en casa, vamos detallar la receta de corderu al fornu, que facemos davezu en Mesón.

ELLABORACIÓN

Xeneralmente solemos facer paletilles al fornu (de 800 gramos), pero diba ser igual si mercáis otres partes del corderu, teniendo en cuenta qu’a más grosor de la carne, más tiempu hai que lo fornar. Pa empezar, untamos tola paletilla cola mantega y añadímos-y un pocu sal. Colocamos la paletilla na rexiya y metémosla en fornu, colocando debaxo una bandexa con un deu d’agua. Demientres el tiempu que tea en fornu, a cada cuartu d’hora aproximao, vamos dir regando la carne col agua la bandexa.
Pelamos y picamos les patates en trozos non mui pequeños, friéndolos a fueu fuerte pa que doren per fuera. Cuando al corderu-y falte media hora, añadimos les patates na bandexa’l fornu.
La idea ye asar el corderu dapoco pa que penetre’l calor y cocine bien pel interior. Poro, vamos poner el fornu a 160º na primer fase que va durar hora y media. En trescurriendo esti tiempu, vamos da-y la vuelta y subir el fornu a 180º demientres 50 minutos, aproximao. Per último, aumentamos la temperatura’l fornu a 220º pa que dore unos 10 minutos. Pa rematar, xebramos la paletilla en dos trozos pa emplatar caún con unes patates y añadiendo salsa de la bandexa al gustu. ¡Bon provechu!