Fish and chips de merluza del Cantábricu con salsa tártara
DAVID MARRÓN
Restaurante Rumble Fish and Chips
Fish and chips de merluza del Cantábricu con salsa tártara
ELLABORACIÓN (15 Min.)
Primero garramos el llombu de merluza fresca del Cantábricu y llimpiámoslu bien, quitando toles espines. Cortamos tres cachos de merluza de mou tresversal, pa que queden d’una forma más allargada, d’unos 60 gr caún.
Salámoslos y envolvémoslos cola masa de tempura. Depués rebozámoslos colos cereales. Freímoslos con aceite abondo, oléicu alto o aceite d’oliva virxe, a 160º unos tres minutos más o menos. Tres esti procesu hai que secar mui bien los cachos de merluza.
Depués frimos les patates a 180º. Secámosles y especiámosles col togarashi. Pa rematar, presentamos los cachos de merluza del Cantábricu enriba la cama de patates especiaes acompañao con una fuentina de salsa tártara. ¡Qu’aproveche!
INGREDIENTES
– 1 Llombu de merluza
– Tempura
– Cereales Corn Flakes
– Sal
– Patates
– Especies togarashi (mezcla d’especies tradicional de la cocina xaponesa, que se pue mercar en grandes superficies, etc)
– Salsa tártara