Cabritu guisao
LOURDES OLIVEIRA
Restaurante Uría (Roces)
Cabritu guisao
ELLABORACIÓN
Adobamos el cabritu trociao; coles manes frotamos los cachos con sal, ayu picao, pimienta y tomillu. Dexámoslo na nevera polo menos 4 hores.
Nuna pota ponemos a calentar aceite a fueu fuerte. De siguío echamos los cachos de cabritu y dorámoslos per tolos llaos. Cuando yá tean doraos echamos la cebolla y los pimientos picaos en taquinos. Dexamos que pochen bien les verdures, amestamos el pimentón y revolvemos bien bien pa que nun queme’l pimentón. Añadimos el vinu blanco y el llimón y dexámoslo unos minutos cola pota tapada. Amestamos un vasu d’agua. Tapamos y dexamos que se faiga a fueu suave una hora aproximadamente. Comprobamos el puntu de sal.
Sírvese acompañao d’unes patates frites en cuadradinos. ¡Bon provechu!
INGREDIENTES (PA 6 PERSONES)
– 2 kg de cabritu
– 2 cebolles grandes
– 1 pimientu coloráu grande
– 1 pimientu verde grande
– 3 serugues o dientes d’ayu
– 4 cuyaraes grandes d’aceite d’oliva
– 1 cuyaradina de pimentón dulce
– Un migayu de pimienta negro
– Un migayu de tomillu
– Una copa de vinu blanco
– Zumu d’un llimón
– Sal